Bu gün AMEA Riyaziyyat və Mexanika İnstitutunun Elmi Şurasında institutun 2014-cü il üçün elmi və elmi-təşkilati fəaliyyəti haqqında hesabatı dinlənilib. İclasda çıxış edən institutun direktoru, fizika-riyaziyyat elmləri doktoru, professor Misir Mərdanov görülmüş işlər barədə şura üzvlərinə məlumat verib. Qeyd edib ki, hazırda institutda 250 nəfər çalışır, onların 159 nəfəri elmi işçidir. Elmi işçilərdən 41-i elmlər doktoru, 89-u isə fəlsəfə doktorudur. AMEA-ya keçirilən seçkilərdə 3 əməkdaşımız müxbir üzv seçilib. Beləliklə, institututda 2 akademik və 4 müxbir üzv fəaliyyət göstərir.
Hesabat ilində institutda 22 doktorant təhsil almış, bu il 4 doktorant qəbul olmuş, 9 nəfərsə doktorantura təhsilini başa vurmuşdur.
İl ərzində dissertasiya şurasında 21 nəfər dissertasiya işi müdafiə etmiş, onlardan 7-si elmlər doktoru, 14 nəfəri isə fəlsəfə doktorudur. Müdafiə edənlərdən 13 nəfəri (3 elmlər doktoru, 10 fəlsəfə doktoru) institutun əməkdaşlarıdır.
Bu ilində institut əməkdaşlarının 390 elmi işi, o cümlədən xaricdə 107, impakt faktorlu olan jurnallarda 56 məqaləsi və 166 tezisi çap olunub, elmi işçilərin əsərlərinə olan isnadların sayı 850-ə çatıb. Qeyd edək ki, keçən il istinadların sayı 672 idi.

Elmi Şura üzvləri institutun bu ilki fəaliyyətini müsbət qiymətləndirib. Daha sonra gələn il üçün təkliflər dinlənilib.

Previous Next