AMEA-nın Rəyasət Heyətinin həftəlik mətbu orqanı olan “Elm” qəzetinin noyabr ayında ilk sayı çapdan çıxıb. Qəzetin ön səhifəsində Azərbaycan Respublikası Prezidentinin 2004-cü il 2 aprel tarixli 46 nömrəli Fərmanı ilə təsdiq edilmiş “Azərbaycan Milli Ensiklopediyasının redaksiya heyəti haqqında Əsasnamə”də dəyişiklik edilməsi barədə Azərbaycan Respublikası Prezidentinin Fərmanı və “Azərbaycan Milli Ensiklopediyası redaksiya heyətinin yeni tərkibinin təsdiq edilməsi haqqında” Azərbaycan Respublikası Prezidentinin 2018-ci il 1 noyabr tarixli 636 nömrəli Sərəncamında dəyişiklik edilməsi barədə Azərbaycan Respublikası Prezidentinin Sərəncamı  təqdim edilib.

Bugünkü sayda, ilk səhifələrdə Azərbaycanın Bosniya və Herseqovinadakı fövqəladə və səlahiyyətli səfiri Vilayət Quliyevin AMEA-nın prezidenti akademik İsa Həbibbəyliyə təbrik məktubu, 2024-cü il üçün Akademiyada fəlsəfə doktoru və elmlər doktoru hazırlığı üzrə doktorantura və dissertanturaya qəbulun nəticələrinin müzakirəsi ilə bağlı AMEA Rəyasət Heyətinin iclasına dair yazı, eləcə də akademik Cəlal Allahverdiyevin 95 illik yubileyinə həsr olunmuş elmi sessiya haqqında informasiya yer alıb.

Qəzetdə “Məhəmməd Füzuli poeziyasının dili və üslubu” mövzusunda respublika konfransı, AMEA-nın Arxeologiya və Antropologiya İnstitutunda Əsir və itkin düşmüş, girov götürülmüş vətəndaşlarla əlaqədar Dövlət Komissiyası ilə birgə çalışan Beynəlxalq Qırmızı Xaç Komitəsinin tanınmış mütəxəssislərinin iştirakıyla “Məhkəmə arxeologiyası” mövzusunda elmi seminar və digər tədbirlərə dair yazılar dərc edilib.

Bundan əlavə, qəzetin bugünkü buraxılışında “Azərbaycan Milli Elmlər Akademiyası – 80” rubrikası altında “Müasir Azərbaycan elmi. Reallıqlar və perspektivlər” və “Elm” qəzeti – 40” rubrikası altında “1 noyabr 1984. “Elm” qəzetinin ilk buraxılışı – 40 il əvvəl”, o cümlədən “Mərkəzi Elmi Kitabxana: tarixdən gələcəyə milli irsin qorunması” və “Türk dövlətləri ilə elmi əlaqələrə töhfə” adlı məqalələr, COP29-a həsr olunmuş tədbirlərdən informasiyalar və yeni elmi nəşrlərə dair xəbərlər təqdim olunub.

Qəzetin rus və ingilis dili bölməsində akademik İsa Həbibbəylinin iştirak etdiyi tədbirlərlə bağlı icmallar və son elmi yeniliklərə dair informasiyalar yer alır.

science.gov.az