Şamilov Ələddin Xalıqverdi oğlu, diferensial tənliklər sahəsində mütəxəssis, 10 mart 1943-cü ildə Basarkeçər rayonunun Qoşabulaq kəndində anadan olmuş, 1958-ci ildə Nərimanlı kənd orta məktəbini, 1963-cü ildə Gəncə Dövlət Pedaqoji İnstitutunu fərqlənmə diplomu ilə bitirmişdir. 1967-1972-ci illərdə Azərbaycan Dövlət Universitetinin Diferensial və inteqral tənliklər kafedrasının aspirantı olmuşdur. 1972-ci ildə Azərbaycan EA müxbir üzvü Qoşqar Əhmədovun rəhbərliyi ilə “Dəyişən gecikməli diferensial tənliklərin həllərinin məhdudluğu və kvazixəttiləşdirmə metodunun müxtəlif çoxnöqtəli sərhəd məsələlərinə tətbiqləri (01.01.02)” mövzusunda namizədlik, 1984-cü ildə V.A.Steklov adına Moskva Riyaziyyat və Mexanika İnstitutunda “Sərbəst sərhədli xüsusi sərhəd məsələləri və onların tədqiq metodları (01.01.02)” mövzusunda doktorluq dissertasiyası müdafiə etmişdir.

O, əmək fəaliyyətinə 1963-cü ildə Zaqatala rayonunda müəllimliklə başlamış, 1969-cu ildə Azərbaycan Dövlət Universitetinə Diferensial və inteqral tənliklər kafedrasında müəllim, 1978-ci ildə dosent, 1987-ci ildə isə professor vəzifələrində çalışmış, 1999-cu ildə Türkiyə Cümhuriyyəti Osmanqazi Universitetinə dəvət olunmuş və 2002-ci ildən hal-hazıra qədər Anadolu Universitetində professor olaraq işləyir. Onun rəhbərliyi ilə 11 fəlsəfə doktoru hazırlanmış, 140-dan çox elmi əsərin müəllifidir.

AR ETN Riyaziyyat və Mexanika İnstitutunun rəhbərliyi və kollektivi iş yoldaşları Şamilov Ələddin Xalıqverdi oğlunun vəfatı ilə əlaqədar mərhumun doğmalarına, yaxınlarına və həmkarlarına dərin hüznlə başsağlığı verir, Uca Tanrıdan səbr diləyir.

ALLAH RƏHMƏT ELƏSİN!

© Bütün hüquqlar qorunur. Xəbərlərdən istifadə edərkən www.imm.az saytına istinad zəruridir.